Një reklamë për shtëpi zbulon pas 80 vitesh kryeveprën e vjedhur nga nazistët

Pas gati tetë dekadash në errësirë, një pikturë e rrallë e artistit italian Giuseppe Ghislandi, e vjedhur nga nazistët gjatë Luftës së Dytë Botërore, është zbuluar rastësisht në një reklamë online për pasuri të paluajtshme në Argjentinë.

“Portreti i një Zonje”, një kryevepër e vitit 1710, ishte pjesë e koleksionit të tregtarit të njohur të artit holandez-hebre, i cili u plaçkit nga regjimi nazist gjatë pushtimit të Holandës.

Për dekada me radhë, fati i pikturës ishte i panjohur, derisa muajin e kaluar imazhi i saj u shfaq në sfondin e një njoftimi për shitje prone në bregdetin argjentinas.
Piktura, siç dyshohet, ishte mbajtur në mënyrë të fshehtë nga familja Kadgien për vite me radhë.

Zbulimi erdhi falë gazetarëve hetues holandezë, të cilët po ndiqnin gjurmët e Kadgien dhe njohën veprën e artit gjatë analizës së fotove të postuara online. Menjëherë pas publikimit të historisë në media, njoftimi u fshi, ndërsa autoritetet argjentinase ndërhynë me bastisje dhe arrestime.

Sipas policisë, Patricia Kadgien dhe bashkëshorti i saj u arrestuan nën akuzat për fshehje dhe pengim të drejtësisë.

Gjatë bastisjeve në Mar del Plata u sekuestruan edhe disa vepra të tjera arti, që dyshohet se kanë origjinë të ngjashme.

Autoritetet kanë njoftuar se vepra është në gjendje të mirë, ndërsa konfirmuan edhe autenticitetin e saj.

Për trashëgimtarët e Goudstikker, ky është një kapitull tjetër i mbyllur në betejën e tyre të gjatë për rikthimin e qindra veprave të grabitura.

Familja ka kaluar dekada duke luftuar për të rivendosur trashëgiminë kulturore të humbur gjatë një prej periudhave më të errëta të historisë moderne.