Një serb dënohet për pjesëmarrje në luftën në Ukrainë

Shtetasi serb Vllado Staniç u dënua me një vit burgim për pjesëmarrje në luftën në territorin e Ukrainës më 2015. Më 15 korrik të këtij viti, Staniç ishte arrestuar në Aeroportin e Beogradit “Nikolla Teslla” dhe më pas ai pranoi para autoriteteve se kishte marrë pjesë në luftë.

Siç shpjegoi gjykatësja gjatë shqiptimit të dënimit më 9 shtator, Staniçit iu shqiptua dënimi minimal për akuzën për pjesëmarrje në luftë apo konflikt të armatosur në një shtet të huaj, për shkak se luftës iu bashkua si pjesë e një grupi. Koha e kaluar në paraburgim do të llogaritet në dënim, shkruan KosovaPress.

Përveç dënimit me një vit burgim, Staniçit iu konfiskuan edhe dokumentet e udhëtimit. Ai është liruar nga burgu dhe do të ftohet që më vonë të vuajë dënimin. Avokatja e Staniçit, Katarina Ninkoviç, tha për Shërbimin e Ballkanit të Radios Evropa e Lirë se do të apelojë vendimin.

“Ne besojmë se këtu nuk ka ndonjë krim të vërtetë sepse në kohën kur u krye krimi, klienti im nuk e dinte se kjo ishte shkelje penale. Kjo pasi, vepra penale për pjesëmarrje në luftë apo konflikt të armatosur është futur në legjislacion më 2014. Ai e kreu krimin më 2015 gjashtë muaj pasi legjislacioni ishte prezantuar”, tha ajo.

LEXONI GJITHASHTU:

• SHBA miraton fondin 2.7 mld dollarë ndihmë për Ukrainën
• Ukraina merr përsipër sulmet në Krime