Njohja e pensioneve nga Italia, Rama: Mbi 500 mijë shqiptarë mund të buzëqeshin

Shqipëria dhe Italia kanë firmosur këtë të martë marrëveshjen e pensioneve mes dy vendeve. Kanë qenë ministrat e Jashtëm Igli Hasani dhe Antonio Tajani, të cilët kanë nënshkruar marrëveshjen në Romë.

Kryeministri Edi Rama, përmes një video mesazhi në faqen e vet në Facebook, Rama e cilëson të sotmen një ditë triumfi për qeverinë e tij, që siç shprehet ka bërë të mundur njohjen e sigurimeve shoqërore  për shqiptarët në 16 shtete.

“Sot janë mbi 500 mijë shqiptarë që mund të buzëqeshin për fundin e një odiseje të gjatë tridhjetë e kusur vite. Qëkur ne nisëm të flasim me qeverinë italiane të kohës për pensionet e emigrantëve shqiptarë dhjetë vjet më parë, ata kanë pritur e kanë pritur. Fillimisht dukej krejt e pamundur për shkak të peshës domethënëse financiare të një marrëveshjeje të tillë. Por ja ku ia dolëm edhe kësaj, ndërkohë që këto dhjetë vjet nisëm dhe mbyllëm me sukses negociatat për marrëveshjet e pensioneve me plot 16 shtete, që nga Gjermania deri në Kanada, ndërkohë që të gjitha qeveritë e mëparshme të mbledhura bashkë kishin mbyllur vetëm një të tillë në thuajse çerek shekulli, atë me Turqinë dhe edhe atë e ka negociuar e mbyllur një tjetër qeveri socialiste para thuajse njëzetë vjetësh… Sot jam shumë krenar për bilancin tërësor të përpjekjes së qeverisjes socialiste në mbështetje të emigrantëve shqiptarëve, të cilët falë kësaj përpjekjeje gëzojnë të drejtën e njohjes së mundit e të djersës së tyre në 16 shtete, ku si pensionistë do të shpërblehen me meritë bazuar në sigurimet shoqërore që kanë derdhur nga puna e tyre e palodhur”, thuhet mes të tjerash në mesazhin e Ramës.

LEXONI GJITHASHTU:

• I akuzuar për trafik droge nga autoritetet italiane, kapet në Durrës 26-vjeçari
• Nënshkruhet marrëveshja e pensioneve mes Shqipërisë dhe Italisë