‘S’ka nevojë për ndërmjetësim Rama-Vuçiç’, Spiropali: E drejta në anën e Kosovës, reciprociteti nuk negociohet

Ministrja e shtetit për Marrëdhëniet me Parlamentin, Elisa Spiropali tha në emisioni ‘Now’ në Euronews Albania se mbështetja e Shqipërisë për Kosovën, jo vetëm për njohje formale të shtetit të Kosovës, por për të krijuar politikë kohezive, është e pakrahasueshme me asnjë vend tjetër.

Znj. Spiropali e cilësoi një show të panevojshëm dhe të dëmshëm nga ana e Serbisë demonstrimin e forcës në kufirin me Kosovën. Sipas saj, në këtë rast nuk ka nevojë për një ndërmjetësim të kryeministrit Rama me presidentin serb Vuçiç pasi e drejta është qartazi në anën e Kosovës.

“Mund të ndërmjetësohet aty ku ka një dyshim se e drejta nuk është në një anë. Në këtë rast mendojmë se e drejta është për Kosovën. Duhet një reciprocitet për marrëveshje për të cilat është rënë dakord mes Kosovës dhe Serbisë. Ne besojmë se Kosova është në të drejtën e saj dhe po vepron ligjërisht përmes policisë së Kosovës. Nuk ka demonstrim të panevojshëm force. E kundërta po ndodh nga Serbia”, tha znj. Spiropali.

Sipas ministres, Kosova duhet të jetë e angazhuar në dialog, bashkë me Shqipërinë, dialog nga i cili nuk ka se si të shmanget Serbia. Ajo vlerësoi kryeministrin Edi Rama si një nga liderët më të angazhuar për paqen në rajonin e Ballkanit.

LEXONI GJITHASHTU:

• Rezarta Çaushaj: Mes Ramës dhe Kurtit ka pasur një rivalitet, s’është konflikt i zakonshëm
• Vizita e Ramës ne Kosovë, diplomati Bashkurti: Vazhdim i ideve të Ramës në OKB për njohjen e Kosovës