Numri i makinave në Shqipëri rritet çdo vit, mbi 1 milion mjete rrugore në qarkullim

Numri i automjeteve në vendin tonë po rritet çdo vit. Me mbi 1 milion makina, Shqipëria regjistron një raport prej 434 mjete për 1,000 banorë.

Në vend ka 1,025,000 mjete rrugore në qarkullim. Krahasuar me të njëjtën periudhë të vitit 2024, numri i përgjithshëm i mjeteve është rritur 9%, ndërsa regjistrimet e reja kanë shënuar gjithashtu rritje.

Sipas kategorisë, autoveturat përbëjnë 81% të mjeteve gjithsej, të ndjekura nga motorët me 6% dhe automjetet për transport të përzier po me 6%.

Tirana mban peshën më të madhe me 35% të mjeteve gjithsej, e ndjekur nga Durrësi me 14%. Gjirokastra dhe Kukësi kanë numrin më të ulët të mjeteve, përkatësisht 2.2% dhe 2.4%.

Gjatë tremujorit të fundit janë regjistruar për herë të parë rreth 26,000 mjete, nga të cilat 82% ishin autovetura.

Sa i përket markave më të përhapura, Volkswagen ruan vendin e parë me 20%, i ndjekur nga Mercedes-Benz me 17%. Dominimi i këtyre markave lidhet me çmimet konkurruese të modeleve të përdorura, pjesët e këmbimit që gjenden më lehtë dhe pasionin e ruajtur ndër vite.