Numri i të vdekurve nga tërmeti në Mianmar arrin në 1644 persona

Sundimtarët ushtarakë të Mianmarit kanë lejuar qindra personel të huaj shpëtimi të hyjnë në vend pas një tërmeti shkatërrues që vrau më shumë se 1,600 persona.

Ky është tërmeti më vdekjeprurës që ka goditur Mianmarin, një vend i varfër dhe i shkatërruar nga lufta civile që ka zgjatur vite. Tërmeti i shkallës 7.7, ndër më të mëdhenjtë që ka goditur Azinë Juglindore në shekullin e kaluar, shkaktoi dëm të madh në infrastrukturën e vendit, përfshirë aeroportet, urat dhe autostradat, ndërsa luftrat civile që kanë shkatërruar ekonominë dhe zhvendosur miliona qytetarë vazhdojnë të rëndojnë situatën.

Numri i viktimave në Mianmar ka arritur në 1,644, njoftoi qeveria ushtarake të shtunën, sipas shërbimit të lajmeve të BBC-së. Në vendin fqinje, Tajlandë, ku tërmeti tronditi ndërtesat dhe shkaktoi shembjen e një rrokaqielli në ndërtim në kryeqytetin Bangkok, të paktën nëntë persona humbën jetën.

Në qytetin e dytë më të madh të Mianmarit, Mandalay, të mbijetuarit u angazhuan në përpjekje shpëtimi me duar të zhveshura, përpjekje të dëshpëruara për të nxjerrë të bllokuarit nga rrënojat, pasi mungonin makineritë e nevojshme dhe autoritetet nuk kishin kapacitet për të menaxhuar situatën. Në Bangkok, operacionet e shpëtimit vazhduan për të shpëtuar 47 persona të zhdukur ose të bllokuar nën rrënoja në një kullë 33-katëshe që u shemb.

Shërbimi Gjeologjik i SHBA vlerësoi se numri i të vdekurve mund të kalonte 10,000 dhe se humbjet mund të tejkalonin prodhimin vjetor ekonomik të Mianmarit. Pas një thirrje të rrallë për ndihmë ndërkombëtare, shefi i juntës ushtarake të Mianmarit, gjenerali Min Aung Hlaing, udhëtoi për në Mandalay për të drejtuar përpjekjet e shpëtimit dhe për të adresuar nevojat urgjente të prekurve nga tërmeti.

LEXONI GJITHASHTU:

• Osmani solidarizohet me popullin e Tajlandës dhe Mianmarit pas tërmetit
• Ministria ruse e Emergjencave dërgon ekipe shpëtimi në Mianmar pas tërmetit