OKB kritikon planin e Sunak për të dëbuar azilkërkuesit në Ruandë: Shkel Konventën

Komisioneri i Lartë i OKB-së për Refugjatët Filippo Grandi dhe Komisioneri i Lartë i OKB-së për të Drejtat e Njeriut Volker Turk i bënë thirrje sot Mbretërisë së Bashkuar të rishikojë planin e saj për transferimin e azilkërkuesve në Ruanda, duke paralajmëruar se masa do të kishte një ndikim të dëmshëm në të drejtat e njeriut dhe mbrojtjen e refugjatëve.

Në një deklaratë të përbashkët, Grandi dhe Turk i bënë thirrje Britanisë që në vend të kësaj të marrë masa praktike për t’u marrë me flukset e parregullta të emigrantëve dhe refugjatëve, raporton Reuters.

“Ligji i ri shënon një largim nga tradita e gjatë e Mbretërisë së Bashkuar për të ofruar strehim për ata në nevojë, gjë që është në kundërshtim me Konventën e Refugjatëve”, tha Grandi.

Turk, i cili ka kritikuar më parë planin, tha se projektligji “minon seriozisht sundimin e ligjit në Britani dhe vendos një precedent të rrezikshëm globalisht”.

Kryeministri britanik Rishi Sunak u zotua dje se do të fillojë dërgimin e azilkërkuesve në Ruandë brenda 10 deri në 12 javë pasi dhoma e lartë e parlamentit miratoi legjislacionin që ishte shtyrë për javë të tëra nga përpjekjet për të anuluar planin.

Vende të tjera evropiane po shqyrtojnë gjithashtu marrjen e masave të ashpra për të ndaluar migrimin e paligjshëm, ndaj Italia planifikon të ndërtojë kampe pritjeje në Shqipëri për mijëra emigrantë që vijnë nga deti, sipas Reuters.

LEXONI GJITHASHTU:

• A do ta varrosë Sunak krijimin më të madh të Churchill pas luftës?
• Gjykata e Lartë në Britani të Madhe vendos për të dërguar azilkërkues në Ruandë