OKB paralajmëron Izraelin kundër transferimit me forcë të civilëve nga veriu i Gazës

Shefi për të drejtat e njeriut në Kombet e Bashkuara, Volker Turk, paralajmëroi Izraelin se çdo transferim të detyruar dhe masiv të civilëve nga veriu i Gazës do të përbënte krim lufte nëse nuk justifikohet nga arsye ushtarake.

Gjatë një konference për media në Nju Jork, Turk shprehu shqetësime për urdhrat e evakuimit të lëshuar nga Izraeli, duke theksuar se ato duken si një përpjekje për të shkëputur Gazën veriore nga pjesa tjetër e territorit.

Ai theksoi se evakuimi i civilëve duhet të përmbushë kriteret e ligjit ndërkombëtar dhe se një transferim masiv i popullsisë do të kishte pasoja të rënda.

Situata ka agravuar ndjeshëm pas sulmeve të Hamasit më 7 tetor, ku u vranë rreth 1.200 njerëz dhe u rrëmbyen afër 250 të tjerë, duke nxitur një ofensivë izraelite që ka rezultuar në më shumë se 42.000 të vrarë në Gazë.

Turk kërkoi gjithashtu që Izraeli të lehtësojë dërgimin e ndihmave humanitare në të gjithë Gazën, pasi qindra mijëra njerëz janë bllokuar në mes të luftimeve dhe ka vështirësi në shpërndarjen e ndihmave.