Operacionet post-tërmet, evakuime në Turqi, në Siri hyn autokolona e parë e ndihmave

Të paktën 28 mijë e 44 persona janë evakuuar të enjten nga qyteti KAHRA-MAN-MARAS, në jug të Turqisë, pranë epiqendrës së tërmetit fatal të së hënës.

Autoritetet lokale kanë saktësuar se gjatë paradites, të paktën 23 mijë e 437 persona u evakuuan në rrugë ajrore dhe 4 mijë e 607 të tjerë në rrugë hekurudhore.

Agjencia turke për menaxhimin e emergjencave, AFAD, shpërndau një paralajmërim për ata që duan të largohen nga qyteti, duke i njoftuar se do të akomodohen në shtëpi pritjeje.

Vlerësimet e fundit të bëra nga Organizata Botërore e Shëndetësisë sugjerojnë se rreth 23 milionë persona mund të preken nga katastrofa.

Në Turqi vazhdon edhe ardhja e ndihmave ndërkombëtare, ndërkohë që sa i takon Sirisë, në vend ka hyrë autokolona e parë me ndihma e OKB-së.

Megjithatë, ekipet e emergjencës paralajmërojnë se ndihmat për qytetarët mund të mbeten pengje të situatës politike.

Të njëjtat struktura kanë paralajmëruar se bilanci i viktimave mund të rëndohet ndjeshëm në orët e ardhshme, sidomos në Siri, ku operatorët po gërmojnë nën rrënoja në kushte të vështira, edhe për shkak të motit të ftohtë me dëborë që ka përfshirë rajonin.

Një zyrtar i lartë tha për CNN se përpjekjet për të ndihmuar njerëzit në rajonet e prekura nga tërmeti kanë qenë jashtëzakonisht të vështira edhe për shkak të konflikteve dhe krizës së vazhdueshme humanitare.

LEXONI GJITHASHTU: 

• Cilat shtete përgjoi balona kineze?
• Pedagogu shqiptar: Nëse tërmeti do të binte në Gjermani, pasojat më të mëdha