Operacioni anti-drogë Shqipëri-Itali, reagon ministri Çuçi

Ministri i Brendshëm, Bledi Çuçi ka reaguar në lidhje me operacionin e përbashkët anti-drogë të zhvilluar në Shqipëri e Itali, ku u godit një grup kriminal, që çoi në arrestimin dhe procedimin e dhjetëra personave.

Përmes një postimi në rrjetet sociale, Çuçi e ka konsideruar një sukses operacionin e kryer nga të dyja vendet.

“Finalizimi i operacionit për goditjen e një grupi kriminal në fushën e narkotikëve që çoi në arrestimin dhe procedimin e dhjetëra personave brenda e jashtë vendit, është një tjetër sukses i punës së Skuadrave të Përbashkëta Hetimore Shqipëri-Itali. Një punë e kryer mirë e me profesionalizëm të lartë në çdo hallkë.

Vetëm në dy vitet e fundit policitë tona janë përfshirë në 52 Skuadra të Përbashkëta Hetimore, një numër rekord po ta krahasojmë me vendet e tjera europiane. Kjo dëshmon besimin e lartë që ka sot Policia e Shtetit në sytë e partnerëve ndërkombëtarë dhe vendosmërinë tonë për të goditur krimin. Përgëzime për Policinë e Shtetit, veçanërisht për efektivët që morën pjesë në këtë operacion, SPAK, Policinë dhe Prokurorinë italiane”, shkroi Çuçi në Facebook.

Prokuroria Posaçme kundër Korrupsionit dhe Krimit të Organizuar ka zbuluar detaje nga operacioni i kryer në bashkëpunim me autoritetet italiane ku u godit një grup kriminal ndërkombëtar i trafikut të lëndëve narkotike.

Sipas SPAK hetimet janë kryer në kuadër të Skuadrës së Përbashkët Hetimore me Prokurorinë e Bergamos, në Itali, e cila është mbështetur nga Eurojust dhe Europol.

Si rezultat i veprimeve hetimore të kryera në Itali dhe në Shqipëri është bërë e mundur që të zbulohet një grup kriminal që ka vepruar në Itali dhe në Shqipëri, që ka patur si qëllim tregtimin e lëndëve narkotike të llojit kokainë, heroinë dhe marijuanë.

Nga veprimet hetimore është bërë e mundur të provohet tregtimi i një sasie prej më shumë se 120 kilogram kokainë, 15 kilogramë heroinë shumë e pastër, si dhe 129 kilogramë marijuanë e 92 kilogramë hashash, të sekuestruara në Itali në disa episode të ndryshme.

Veprimtaria kriminale e këtij grupi është zhvilluar për periudhën kohore nga viti 2015 dhe në vazhdim dhe është zhvilluar në Shqipëri kryesisht në Durrës, si dhe në qytete të ndryshme në Itali, si në Bergamo, në Breshia, në Milano, në Torino etj, vende ku është kryer transportimi dhe tregtimi i lëndëve narkotike.

LEXONI GJITHASHTU

• “Trafikuan 120 kg kokainë”- SPAK zbardh detaje nga megaoperacioni
• Zbardhen emrat, kush janë shqiptarët e goditur nga operacioni i SPAK dhe italianëve
• Megaoperacion në Itali dhe Shqipëri, arrestohen 43 persona. Sekuestrohen 4 milionë €