Opozita këmbëngul tek pjesëmarrja fizike në komisione, akuza mazhorancës për shkelje të rregullores

Ditën e sotme, Komisioni i Veprimtarisë Prodhuese zhvilloi mbledhjen e parë online, e cila zgjati vetëm pak minuta. Deputetët e PD-së edhe pse ishin fizikisht në sallë, nuk iu dha fjala.

Pas mbledhjes deputeti demokrat, Helidon Bushati tha se do të jenë gjithmonë prezent në mbledhje “për të bërë të mundur rikthimin e parlamentarizmit dhe Rama të mos marrë peng Shqipërinë”.

Ndërsa, në Komisionin e Medias u paraqitën në sallë vetëm deputetët e opozitës.

Kryetari i Komisionit të Medias, Agron Gjekmarkaj deklaroi se mazhoranca nuk përballet dot me opozitën për të diskutuar dhe vendosën që të dilnin nga salla.

“Kukullat e Edi Ramës nuk kanë fuqi të përballën me opozitën. Opozita është këtu për të ruajtur ligjet e vendit, për të mbrojtur Kushtetutën”, tha Gjekmarkaj.

Ai i bëri thirrje kryetares së Kuvendit, Lindita Nikollës që të mos plotësojë vetëm dëshirat e Edi Ramës, por të respektojë edhe rregulloren.

Por, pak minuta më vonë, edhe kjo mbledhje u zhvillua online nga nënkryetari i komisionit, Petro Koçi, ku morën pjesë vetëm deputetët e maxhorancës.

Maxhoranca ka vendosur që mbledhjet në komisone të zhvillohen online, për shkak të situatës së pandemisë. Ky vendim është kundërshtuar nga deputetët e opozitës.

LEXONI GJITHASHTU:

• Debate tek Komisioni i Ligjeve, deputetëve demokratë nuk u jepet fjala pasi u paraqitën fizikisht
• Nënkryetarja e Komisionit të Ekonomisë: Qeveria të ulë taksat për prodhuesit e bukës, të krijohen rezerva mielli