“Ora e Papa Françeskut”, kisha në Gazë do e nderojë çdo ditë me rënie kambanash

Papa Françesku mbeti një avokat i palodhur për paqen në Gaza dhe Bregun Perëndimor, duke u lutur për t’i dhënë fund konfliktit Izrael-Hamas deri në orët e tij të fundit.

Që nga shpërthimi i luftës, Papa kishte vendosur një ritual të natës, raporton Emma De Ruiter e Euronews : duke thirrur Kishën e Familjes së Shenjtë, famullinë e vetme katolike në Gaza, për të kontrolluar rreth 600 njerëzit që strehohen atje.

At Gabriele Romanelli, famullitari, tha se thirrja e fundit e Papës erdhi të shtunën e kaluar, vetëm dy ditë para vdekjes së tij. “Ai na kërkoi të lutemi, na dha bekimin e tij dhe na falënderoi për të gjithë shërbimin tonë për paqen”, tha Romanelli.

Sot u transmetua varrimi i Papa Françeskut në Kishën e Shenjtë të Familjes, e cila po ashtu është përgatitur për të kremtuar një meshë të veçantë në kujtim të tij pasdite, e më pas do të vijë rruzarja dhe lutjet mortore.

Duke filluar nga sonte, njoftoi Romanelli, këmbanat e kishës do të bien çdo mbrëmje në orën 20:00 me orën lokale për të kujtuar “Orën e Papës”, thirrjet e tij të natës në famulli.