Orban: BE të heqë ndalimin e importit të gazit rus pas sulmit të SHBA ndaj Iranit

Kryeministri hungarez Viktor Orbán i bëri thirrje Bashkimit Evropian që të heqë nga rendi i ditës propozimin për ndalimin e importit të gazit rus, për shkak të rritjes së pritur të çmimeve të energjisë pas bombardimeve amerikane të Iranit.

“Ne duhet të luftojmë rritjen e mëtejshme të çmimeve të energjisë. Ky është një kërcënim serioz. Prandaj, ne duhet të heqim rregulloret dhe ndalimet e Brukselit për energjinë ruse. Kemi mjaft probleme duke pasur parasysh ndikimin negativ të luftës Iran-Izrael mbi çmimet e energjisë”, tha Orban në një video të postuar në Facebook, pas takimit të tij me Këshillin Hungarez të Mbrojtjes, raporton Reuters.

Të martën, Komisioni Evropian propozoi një ndalim ligjërisht të detyrueshëm për importin e gazit rus dhe gazit natyror të lëngshëm në BE deri në fund të vitit 2027, duke përdorur masa ligjore në mënyrë që plani të mos bllokohet nga anëtarët e BE-së, Hungaria dhe Sllovakia.

BE-ja deri më tani ka vendosur sanksione për shumicën e importeve të naftës ruse, por jo për gazin, për shkak të kundërshtimit nga Sllovakia dhe Hungaria, të cilat mbajnë lidhje të ngushta me Moskën.

LEXONI GJITHASHTU:

• Ushtria izraelite: Kemi sulmuar 6 aeroporte në Iran
• Orban: Evropa nuk e mbështet iniciativën e Trump për paqe në Ukrainë