Orban: Budapesti është gati të presë bisedimet e paqes midis Rusisë dhe Ukrainës

Qëndrimi i Hungarisë ndaj konfliktit midis Ukrainës dhe Rusisë është i qartë dhe kur të mbahet Samiti i Paqes në Budapest, ne do të bëjmë gjithçka që ai të ketë sukses, njoftoi sot kryeministri hungarez Viktor Orbán pas një takimi me presidentin rus Vladimir Putin.

“Si fqinjë të konfliktit, ne e shohim ndikimin e tij çdo ditë, te familjet dhe në ekonominë tonë. Qëndrimi i Hungarisë është i qartë. Ne duam paqe dhe jemi të gatshëm të organizojmë bisedime që mund ta sjellin atë më afër realizimit. Kur të mbahet Samiti i Paqes në Budapest, ne do të bëjmë gjithçka që mundemi për të siguruar suksesin e tij. Hungaria do të punojë gjithmonë për paqen”, shkroi Orbán në llogarinë e tij në rrjetin X.

Sot në Moskë, kryeministri hungarez u takua me presidentin rus Vladimir Putin, i cili tha se Presidenti i Shteteve të Bashkuara të Amerikës, Donald Trump, sugjeroi zhvillimin e bisedimeve midis Rusisë dhe SHBA-së në Hungari, raportuan mediat ruse.

“Ai tha menjëherë: ‘Ne kemi marrëdhënie të mira me Hungarinë – ju keni marrëdhënie të mira me Viktorin, dhe unë gjithashtu i kam – këtu, unë propozoj këtë opsion. ‘ Sigurisht, ne do të ishim të lumtur të biem dakord”, tha presidenti rus.

Putin vuri në dukje se do të ishte i lumtur të zhvillonte një takim në Budapest nëse palët bien dakord për këtë dhe shtoi se Moska është në dijeni të qëndrimit të ekuilibruar të Hungarisë ndaj Ukrainës.

“Faleminderit që reaguat kaq shpejt ndaj mundësisë së një takimi midis meje dhe Presidentit të Shteteve të Bashkuara të Amerikës në vendin tuaj”, tha Putin.

Orbán, nga ana e tij, deklaroi se është gati të ofrojë një platformë për negociata.