Orban thotë se është i gatshëm të “pushtojë” Brukselin për të sjellë ndryshim në BE

Kryeministri i Hungarisë, Viktor Orban, tha se është i gatshëm të marshojë në Bruksel dhe të “pushtojë” zemrën e Bashkimit Evropian para zgjedhjeve për Parlamentin Evropian, teksa partitë opozitare mbajtën një protestë antiqeveritare në Budapest.

Orban, që është në pushtet që 14 vjet, po shpreson që partia e tij Fidesz të përfitojë nga rritja e mbështetjes për krahun e djathtë në mbarë Evropën, teksa po përgatitet të marrë udhëheqjen e presidencës së BE-së për pjesën e dytë të vitit.

Duke folur në një tubim në Budapest në ditën kombëtare të Hungarisë, Orban tha se zgjedhjet evropiane janë shans për të mbështetur Hungarinë.

“Nëse ne mbrojmë lirinë dhe sovranitetin e Hungarisë, ne nuk kemi asnjë zgjedhje tjetër përpos që të pushtojmë Brukselin”, tha Orban gjatë fjalimit para mbështetësve të tij.

“Ne do të marshojmë në Bruksel dhe do të sjellim për vete ndryshimin në BE”.

Orban për një kohë të gjatë ka pasur mosmarrëveshje me shtetet anëtare të BE-së për një sërë çështjesh, përfshirë edhe refuzimin e tij që t’i dërgojë Kievit armë, por edhe për shkak se mban raporte ekonomike me Moskën, edhe pas nisjes së pushtimit rus të Ukrainës më 2022.

Ai tha se vendimet e BE-së po godasin fermerët, po godasin klasën e mesme dhe po dëmtojnë kompanitë “dhe mbi të gjitha, po e fusin Evropën në luftë”.

“Ne nuk do të pranojmë faktin që Brukseli i ka lënë vetëm evropianët, dhe për më tepër i ka kthyer kundër njëri-tjetrit”, tha Orban.

Partitë opozitare hungareze mbajtën tubime më 15 mars dhe mijëra persona morën pjesë në to. Këto tubime u organizuan nga Peter Magyar, biznesmen, që më herët ishte i afërt me Fideszin e Orbanit. Ai paralajmëroi se shpejt do të krijojë një parti të re për të sfiduar qeverisjen e Orbanit.

LEXONI GJITHASHTU:

• Orban: Kthimi i Trump është i vetmi shans për t’i dhënë fund luftës në Ukrainë
• Skandali seksual në Hungari, protesta kundër kryeministrit Orban