Oriola Pampuri: Shumë gra dhe vajza ndihen të rrezikuara nën çati

Deputetja e Partisë Demokratike, Oriola Pampuri shprehet se protestat kundër dhunë dhe vrasjes së grave shërbejnë për ndërgjegjësim por nevojitet reagimi i autoriteteve shtetërore për të parandaluar ngjarje të tilla në ta ardhmen.

Znj. Pampuri komentoi në këtë mënyrë në emisionin “Now” protestën e mbajtur këtë të mërkurë në Tiranë pas vrasjes së Sabrina Bengajt nga ish-bashkëshorti i saj.

“Sa herë ka pasur raste të tilla kam reaguar. Këtë herë refuzova të vendos foton e vajzës në profilin tim në Facebook dhe Instagram sepse thash sa të pafuqishëm tregohemi ndaj ngjarjeve të tilla. Si nënë, si grua, si motër ndihem shumë e indinjuar ndaj një ngjarjeje të tillë. Protestat ndërgjegjësojnë shoqërinë por duhet mbështetje nga autoritete”, tha znj. Pampuri.

Deputetja me profesion si psikologe tha se numri i grave dhe vajzave të dhunuara është shumë i lartë dhe ato ndihen të rrezikuara edhe kur kanë urdhër mbrojtjeje nga gjykatat.

“Shumë gra dhe vajza dhunohen fizikisht dhe psikologjikisht dhe ndihen të rrezikuara brenda asaj çatie që duhet të ofronte siguri”, deklaroi znj. Pampuri.