Osmani: Kosova e sheh NATO-n si garanci për siguri dhe paqe në rajon

Presidentja Vjosa Osmani deklaroi se Kosova e sheh anëtarësimin në NATO si një garanci për siguri dhe paqe në rajon.

Deklaratën, Osmani e dha këtë të hënë në Mal të Zi, gjatë Samitit për Demokraci të Europës Juglindore me temë: “Lufta në Evropë dhe ndikimi në Ballkan”.

“Aspiratat e Kosovës për anëtarësim në NATO nuk janë vetëm deklarim politik. Anëtarësimin në NATO, duke filluar me Partneritetin për Paqe, e shohim nga këndi i sigurisë dhe ju ftojmë të gjithë ta bëni njësoj. Anëtarësimin në NATO e shohim si garancinë më të mirë për paqen afatgjatë dhe të qëndrueshme në rajon”, ka theksuar presidentja Osmani.

Ndër të tjera, Osmani është shprehur se lufta e zhvilluar dy dekada më parë në Kosovë i ka bërë kosovarët ta kuptojnë më së miri luftën që po zhvillohet sot në Ukrainë.

LEXONI GJITHASHTU

• Kosova s’ndryshon qëndrim, refuzon takimin e radhës për Ballkanin e Hapur
• Ambasadori italian: Kosova nuk mund të presë më për liberalizimin e vizave