Osmani: Kosova në ETIAS, por pa ndikuar në vendimin për liberalizim të vizave

Presidentja Vjosa Osmani ka pritur sot në takime të ndara përfaqësuesit e pesë shteteve që u raportua se kanë mbështetur propozimin që procesi i liberalizimit të vizave për Kosovën të lidhet me funksionalizimin e sistemit për siguri në Evropë, ETIAS.

Osmani dhe përfaqësuesit e Francës, Suedisë, Holandës, Belgjikës dhe Austrisë në Kosovë kanë biseduar për zhvillimet pas takimit të djeshëm të grupit teknik punues për vizat të Këshillit Evropian, lidhur me liberalizimin e vizave për Kosovën, shkruan KlanKosova.

Osmani ka theksuar nevojën që vendimmarrja politike lidhur me liberalizimin e vizave brenda BE-së të përmbyllet brenda kryesimit çek të BE-së, duke ditur se nuk ka qëndrime kundërshtuese nga asnjë prej shteteve anëtare të BE-së për këtë temë.

Osmani shprehu besimin që kërkesat teknike të ngritura nga disa prej shteteve anëtare të BE-së lidhur me ETIAS të mos ndikojnë në vendimmarrjen politike dhe caktimin e ditës së hyrjes në fuqi të vendimit për liberalizimin e vizave për qytetarët e Kosovës.

LEXONI GJITHASHTU:

• Osmani pas pranimit të Raportit për Kosovën: Do të aplikojmë për anëtarësim në BE