Osmani takon Lajçak: Plani evropian të mos prekë sovranitetin e Kosovës

I dërguari i Bashkimit Evropian për dialogun mes Kosovës dhe Serbisë, Miroslav Lajçak, të enjten nisi vizitën dyditore në Prishtinë, që synim ka përgatitjet për rundin e ri të dialogut dhe për planin për zbatimin e propozimit evropian për normalizimin e raporteve me Serbinë.

Lajçak gjatë vizitës në Prishtinë, fillimisht u takua me presidenten e Kosovës, Vjosa Osmani.

Sipas njoftimit për media, Osmani gjatë takimit tha se plani i zbatimit të propozimit evropian për normalizimin e raporteve mes Kosovës dhe Serbisë duhet të jetë në frymën e “paprekshmërisë së sovranitetit, integritetit territorial, kushtetutshmërisë dhe funksionalitetit të shtetit të Kosovës”.

Osmani tha po ashtu se Kosova është konstruktive në dialogun me Serbinë dhe mbetet e angazhuar në këtë proces, “ndërsa ka ritheksuar se fjalën përfundimtare rreth një marrëveshjeje duhet ta thotë Kuvendi i Kosovës në përputhje me procedurat kushtetuese”, u tha në njoftimin e Presidencës.

LEXONI GJITHASHTU:

• Xhaçka përshëndet vendimin për liberalizimin e vizave për Kosovën
• Vendimi për heqjen e vizave për Kosovën, Rama: BE hoqi nga vetja njollën e turpit