Osmani: Veriu i Kosovës sfidë për shkak të pretendimeve territoriale të Serbisë

Presidentja e Kosovës, Vjosa Osmani, tha se “ideja hegjemoniste” e Serbisë për vendosjen e trupave në Kosovë ka marrë fund më 12 qershor 1999, ditën kur kanë hyrë në Kosovë trupat paqeruajtëse të NATO-s.

Gjatë fjalimit vjetor para deputetëve të Kuvendit të Kosovës, Osmani theksoi se veriu i Kosovës, i banuar me shumicë serbe, vazhdon të jetë sfidë për shkak të pretendimeve territoriale të Serbisë.

Osmani nënvizoi se institucionet e Kosovës janë të vendosura për të ofruar siguri për qytetarët e Kosovës që jetojnë në këtë pjesë, teksa tha se “bandave kriminale” nuk po u pëlqen vendosmëria e institucione për sundim të ligjit.

“Ata do të përballen me drejtësinë për veprat penale kundër rendit kushtetues dhe kërcënimit e frikësimit të qytetarëve”, tha Osmani.

Ndër të tjera, ajo deklaroi se procesi i dialogut me Serbinë duhet të përqëndrohet në njohje të ndërsjellë, që sipas saj do të ishte garanci për paqe të qëndrueshme dhe afatgjatë.

Fjalimi vjetor i Osmanit vjen në të njëjtën ditë kur presidenti serb, Aleksandër Vuçiç, ka paralajmëruar se do t’i drejtohet KFOR-it me kërkesë për dërgimin e deri 1.000 trupave ushtarake dhe policore në Kosovë.

LEXONI GJITHASHTU: 

• Pastrim parash, banka më e madhe në Danimarkë gjobitet me 470 milionë euro
• Gazmir Raci: Çekia e ndihmoi Kosovën për vizat
• Sekreti i Fate Velaj: Pse më pëlqen t’i fotografoj njerëzit pa mendje