Paditen Blatter dhe Platini, akuzohen për kryerjen e pagesave të paligjshme

Ish-presidenti i FIFA-s, Sepp Blatter dhe ai i UEFA-s, Michel Platini janë paditur nga autoritetet zvicerane për organizimin e një pagese të paligjshme.

Lajmin e bëri të ditur ditën e martë zyra e Prokurorit të Përgjithshëm të Zvicrës, e cila saktësoi se pagesa kapte vlerën e 2 milionë frangave.

Sipas njoftimit, Blatter dhe Platini akuzohen të dy për mashtrim, shpërdorim detyre, keqmenaxhim dhe falsifikim dokumentesh.

Për prokurorët, pagesa e bërë dëmtoi asetet e Federatës Ndërkombëtare të Futbollit dhe pasuroi në mënyrë të paligjshme Platini.

Çështja ndaj krerëve të organizmave të futbollit ndërkombëtar ishte hapur në shtator të 2015-s dhe kishte çuar në dëbimin e tyre nga bota e futbollit.

Ajo ka në fokus një kërkesë pagese të bërë nga Platini për një punë këshilluese që ai kishte bërë për shefin e FIFA-s në periudhën 1998-2002.

Kërkesa në fjalë, sipas hetuesve, është bërë 8 vjet nga përfundimi i detyrës zyrtare që zoti Platini kishte dhe me përfshirjen e Blatter u bë e mundur në vitin 2011.

Në kohën kur çështja u hap, si Blatter, 85, ashtu edhe Platini, 66 vjeç, mohuan çdo shkelje. Por tani ata do të përballen me një proces gjyqësor, që do të mbahet në lokalitetin Bellinzona.