“Pagat rrisin çmimet”, Sejko: Nëse rritet produktiviteti, inflacioni do jetë i ulët

Banka e Shqipërisë sugjeron që rritja e pagave të shoqërohet edhe me rritjen e produktivitetit. Për Guvernatorin, Gent Sejko kjo masë paralele, do të ndikojë në një luhatje çmimesh më të kontrolluar.

Banka e Shqipërisë nuk e ka një projeksion se sa do të jetë pesha e rritjes së çmimeve në treg, pas vendimit të rritjes së pagave, por efekti shtesë do të jetë i padiskutueshëm. Komenti vjen nga Guvernatori Gent Sejko në Komisionin e Ekonomisë.

“Rritja e pagave sjell rritje konsumi dhe rritja e konsumit sjell inflacion. Se sa do të ndikojë rritja e pagave në inflacion, kjo është tjetër gjë, por natyrisht që do të ketë rritje në inflacion”- shtoi Sejko.

Për guvernatorin, rritjen e rrogave është pozitive, pasi koha për një vendimarrje të tillë kishte ardhur, por është e rëndësishme që bizneset dhe administrata të rrisin produktivitetin në vazhdim.

‘Për të qenë më konkurrues ne kemi një sfidë të madhe që është emigracioni dhe një nga elementët është rritja e pagave. Sigurisht që rritja e pagave duhet të jetë paralel me produktivitetin.  Nëse do të kishte rritje pagash pa rritje të produktivitetit, atëherë ndikimi në inflacion do jetë më i lartë. Nëse rritja e pagave do të shoqërohet me rritje produktiviteti, me investime në teknologji dhe burime njerëzore inflacioni do të jetë më i ulët”- tha ai.

Parlamenti votoi shtesën e pagave në administratë është bërë në muajin maj, periudhë kur inflacioni është në nivelin 4.5%.

LEXONI GJITHASHTU: 

• Lajçak: Duhet zgjidhje urgjente politike për veriun e Kosovës, dhuna e papranueshme
• “Qëndroi 10 ditë në Beograd”, Noka kërkon llogari nga Begaj për kryetaren e SHISH