Paketa anti-shpifje, Rama: Do ta miratojmë, Komisioni i Venecias s’ka thënë se është jo-demokratike

Kryeministri Edi Rama këmbënguli të mërkurën gjatë një konference të përbashkët me ministren e Jashtme suedeze Ann Linde se qeveria do ta kalojë paketën anti-shpifje dhe se Komisioni i Venecias në rekomandimet e tij nuk ka thënë se “drafti është jo-demokratik”.

Rama tha gjatë konferencës se draftin e ri të paketës ligjore që ndryshon ligjin e medias online, njohur ndryshe nga qeveria shqiptare si “paketa anti-shpifje”, nuk do ta dërgonte më në Komisionin e Venecias. Me ironi ai u shpreh se “ishte krenar” që po kalonte një ligj të tillë edhe pse kishte kryesuar këtë vit presidencën e OSBE-së.

Ministres së Jashtme suedeze Ann Linde iu kërkua koment dhe se çfarë qëndrimi kishte vendi i saj rreth kësaj çështjeje. Gazetari i Rrjetit Ballkanik të Gazetarëve Hulumtues (BIRN) Besar Likmeta i kujtoi ministres se Këshilli Evropian i ka vendosur Shqipërisë çështjen e ligjit të medias si parakusht për mbajtjen e konferencës së parë ndërqeveritare për integrimin. Likmeta tha se “Këshilli ka kërkuar që qeveria të dëgjojë thirrjen e Komisionit të Venecias, që ligji nuk është në përputhje me standardin evropian”.   

“Suedia është mbrojtëse e hapur e lirisë së medias dhe është e rëndësishme që qeveria të diskutojë me gazetarët dhe shoqërinë civile në këtë proces,” – tha ministrja suedeze teksa më pas u ndërpre nga ndërhyrja e kryeministrit Rama, i cili e konsideroi me qasje të rreme kërkesën për koment të gazetarit Likmeta.

“Ajo që u tha është e rreme, draft-ligji u diskutua më shumë se një vit, me OSBE-në, e nisëm me modelin gjerman, na u tha se nuk ishte demokratik, vazhduam me modele franceze dhe kroate dhe na u tha se edhe ato nuk ishin demokratike, më pas bëmë një [draft] shumë demokratik të bazuar në konsulencën e OSBE-së që në këndvështrimit tim nuk trajton atë plagën dhe murtajën e debatit shqiptar në lidhje me lajmet e rreme, shpifjen, sulmet personale dhe diskriminimin e njerëzve, por sërish ofron së paku mundësinë që njerëzit të mbrojnë veten kur gjenden të sulmuar, dhe kur po flisnim për këtë ligj mbështetja më e madhe vinte nga biznesi sepse ata shantazhohen çdo ditë, megjithatë ne e dërguam ligjin në Komisionin e Venecias, ai nuk tha se ligji është në kundërshti me parimet demokratike ai dha disa rekomandime që ne do t’i respektojmë një-për-një, sepse në këtë xhungël disinformimi dhe sulmi ndaj personaliteteve apo keqedukimit të të rinjve, së paku individët duhet të kenë të drejtën të kërkojnë llogari përpara gjykatës çdokujt që po i sulmon duke u fshehur pas anonimitetit, kjo nuk mund të vazhdojë

“Ju sugjeroj të shihni filmin “Dilema Sociale” [Social Dilemma], shiheni dhe le ta diskutojmë,” – u shpreh në fund Rama.

“Dilema Sociale” është një dokumentar i Jeff Orlowskit, prodhuar dhe shfaqur së fundmi në rrjetin Netflix. Dokumentari hedh dritë mbi ndikimin e teknologjisë dhe rrjeteve sociale në jetën e përditshme.

Ai mëton të ndërgjegjësojë dhe të ngre gishtin te kompanitë e mëdha të teknologjisë, si Google, Facebook apo Twitter, të cilat sipas ekspertëve të marrë në pyetje, nxisin varësinë e njerëzve te teknologjia dhe nuk kujdesen të mbajnë larg materialet apo informacionet e pa-vërteta, dhunën, bullizmin, që promovohen në platformat e tyre.

Facebook ka hedhur poshtë pretendimet dhe e ka konsideruar dokumentarin “konspiracon me natyrë sensacionaliste”. 

“Në vend që të ofrojnë një vështrim të gjerë ndaj teknologjisë, dokumentari jep një pamje të deformuar të mënyrës se si platformat e mediave sociale përshkallëzojnë ato që janë vështirësi dhe probleme komplekse të shoqërisë. Krijuesit e filmit nuk përfshijnë njohuritë nga ata që aktualisht punojnë në kompanitë, ose ndonjë ekspert që ka një këndvështrim tjetër për narrativën e paraqitur nga dokumentari,” – thuhet në një reagim të Facebook.

Lexoni gjithashtu:

Lufta kundër krimit të organizuar, kryeministri Rama konferencë me ministren e Jashtme suedeze