Pakistani dhe Afganistani bien dakord për armëpushim të përkohshëm 48-orësh

Pakistani dhe administrata afgane e talebanëve kanë rënë dakord për një armëpushim të përkohshëm 48-orësh. Armëpushimi do të nisë sot nga ora 18:00 sipas kohës lokale të Pakistanit

Ministria e Jashtme e Pakistanit tha në një deklaratë se Pakistani dhe Afganistani do të bëjnë përpjekje të sinqerta, përmes dialogut, për të gjetur një zgjidhje pozitive për çështjen komplekse, por të zgjidhshme.

Më herët, një konflikt i ri shpërtheu në kufirin e dy vendeve, me një sulm ajror nga forcat pakistaneze në provincën Kandahar dhe dhjetëra viktima, duke përkeqësuar marrëdhëniet midis dy fqinjëve dhe duke ringjallur një luftë të vjetër për ndikim që ka filluar që nga viti 2021.

Në të njëjtën kohë, shpërthyen luftime të reja përgjatë kufirit, me civilë dhe ushtarë që humbën jetën. Konkretisht, talebanët afganë njoftuan se më shumë se 12 qytetarë të tyre u vranë dhe rreth 100 u plagosën kur forcat pakistaneze nisën një sulm të mërkurën herët në zonën Spin Boldak. Islamabadi pretendoi se katër qytetarë pakistanezë u plagosën në sulmet e forcave talebane në zonën Chaman.