Pamjet e dhunimit të policit në Tiranë: I bllokojnë rrugën, e qëllojnë me shkopinj

Gjykata e Tiranës ka lënë në burg Blerim Bulicën i akuzuar se së bashku me 5 persona të tjerë, dhunoi efektivin e policisë Ervin Fanaj dhe vëllain e tij Bledar Fanaj, në Kombinat.

Bulica e ka mohuar autorësinë e ngjarjes duke kërkuar lirimin nga qelia. Më tej është shprehur se nuk e njeh efektivin e dhunuar.

Prokuroria arsyetoi se bazuar në veprimet e para hetimore, Bulica bashkë me familjarët e tij dhe rrethin shoqëror ka qenë i pranishëm në skenat e dhunës së ndodhur në Kombinat ndaj efektivit të policisë Ervin Fanaj dhe vëllait të këtij të fundit Bledar Fanaj.

Ngjarja ka ndodhur si pasojë e një konflikti për motive të dobëta në të cilën ka qenë i përfshirë vëllai i efektivit.

Ndërsa në kërkim vijojnë të jenë Besart Bulica, Shaban Bulica, Bekim Bulica dhe Benard Aliaj.

Siç shihet dhe nga pamjet e siguruara nga Euronews Albania, 5 personat i bllokojnë rrugën foristradës së policit dhe qëllojnë me shkopinj në drejtim të makinës.