Pamjet me dron nga aksidenti tragjik i furgonit me pasagjerë, 1 i vdekur dhe 12 të plagosur në autostradën Tiranë–Durrës

Këto janë pamjet e siguruara nga Euronews, të furgonit të linjës Tiranë-Berat dhe anasjelltas që u aksidentua këtë të martë në autostradën Tiranë–Durrës, ku si pasojë humbi jetën shoferi, ndërsa 12 pasagjerë mbetën të plagosur.

Të plagosurit janë dërguar për trajtim në Spitalin e Traumës në Tiranë ku bëhet me dije se 7 prej tyre janë në gjendje të rëndë shëndetësore përfshirë dhe një fëmijë.

Rrethanat e aksidentit nuk janë sqaruar ende plotësisht, por dyshohet se drejtuesi i mjetit ka humbur kontrollin, duke bërë që furgoni të përplaset dhe të përfundojë jashtë rrugës.

Në momentin e aksidentit në furgon ishin rreth 18 persona ndërsa fillimisht u raportua për dy viktima por policia sqaron se fëmija i plagosur është rikthyer në jetë në një spital privat ku e kishin çuar pa shenja jete.

“Një fëmijë, i cili mbërriti në spitalin privat pa shenja jete dhe fillimisht u raportua si viktimë, u rikthye në jetë nga ekipi mjekësor përmes procedurave të reanimimit. Më pas, fëmija është transportuar në Spitalin Ushtarak dhe ndodhet nën kujdes intensiv mjekësor”, njofton policia.