Pamjet satelitore tregojnë përmasat e varrit masiv në Izym, u gjetën mbi 400 trupa

Fotot që tregojnë hyrjen në “varrezat e pyllit” nga marsi deri në gusht të këtij viti tregojnë qindra trupa të varrosur aty pranë.

Në varret e zbuluara dy ditë më parë janë zbuluar kufomat e më shumë se 440 personave, duke përfshirë trupat e fëmijëve dhe ushtarëve të Ukrainës.

Republika Çeke, e cila aktualisht mban presidencën e BE-së, bëri thirrje për formimin e një “gjykate të posaçme ndërkombëtare” pasi u zbulua një varr masiv në Izyum, një qytet në verilindje të Ukrainës, raporton Guardian.

Në një seri postimesh të shtunën, Jan Lipavsky, ministri i jashtëm i Republikës Çeke, shkroi:

“Rusia ka lënë pas varrezat masive të qindra njerëzve të pushkatuar dhe torturuar në zonën e Izjum. Në shekullin XXI, sulme të tilla ndaj popullatës civile janë të paimagjinueshme dhe të neveritshme. Këtë nuk duhet ta anashkalojmë. Ne qëndrojmë për dënimin e të gjithë kriminelëve të luftës. Unë bëj thirrje për krijimin e shpejtë të një gjykate ndërkombëtare speciale që do të ndjekë penalisht krimin e agresionit”

Zyrtarët ukrainas zbuluan më shumë se 440 trupa, disa me duar të lidhura pas shpine. Presidenti i Ukrainës, Volodymyr Zelensky, përmend edhe qytete të tjera të Ukrainës, ku autoritetet njoftuan se trupat ruse në tërheqje lanë pas varreza masive të civilëve, raportoi AP.

“Bucha, Mariupol, tani, për fat të keq, Izyum”, tha presidenti ukrainas. “Rusia e lë vdekjen kudo. Dhe duhet të përgjigjet për këtë”.

LEXONI GJITHASHTU:

• Putin: Dëshiroj që lufta në Ukrainë të përfundojë sa më shpejt të jetë e mundur
• Zbulohet një tjetër varr masiv në Ukrainë, mbi 400 trupa të pajetë