Panairi agro-kulturor në Përrenjas, fermerë e artizanë prezantojnë produktet lokale

Në Përrenjas është çelur Panairi agro-kulturor, një aktivitet që mblodhi bashkë fermerë, artizanë dhe biznese lokale të zonës. Në stenda u ekspozuan nënproduktet e qumështit, frutat, si edhe veshje tradicionale e punime artizanale.

“Kam 25 vite që merrem me këtë punë dhe vazhdoj këtë traditë të Rrajcës. Veshja popullore përcillet brez pas brezi dhe ne duam ta trashëgojmë. Të rinjtë janë larguar në kurbet dhe nuk e duan këtë punë”, thotë një artizane.

Fermerët prezantuan mjaltë, djathë stani dhe produkte organike, duke nxitur konsumimin e produkteve lokale dhe promovuar cilësinë e tyre.

“Shumë na ndihmojnë. Kemi sjellë djathin, gjalpin dhe gjizën. Patëm edhe çaj, por na u shit. Shkojnë e shiten sepse është djathë bio, djathë stani. Kush i merr më tepër? Fshatarët dhe qytetarët. Ka kërkesa shumë”, shprehet një nga fermeret pjesëmarrëse në panair.

Ky panair Agro-Kulturor tregoi se përveç potencialit bujqësor, Prrenjasi mbetet një qendër e gjallë e trashëgimisë kulturore, duke e kthyer prodhimin vendas dhe traditat në një burim krenarie e zhvillimi për zonën.

LEXONI GJITHASHTU:

• Mjalti i Librazhdit, traditë dhe art, 250 bletërritës në panairin e 8-të
• Maliq/ Panairi i prodhimeve bujqësore dhe tradicionale