Papa Françesku po mbahet në spital për kontrolle shëndetësore

Papa Françesku po mbahet në spital për kontrolle pasi mori pjesë në një takim të planifikuar në një spital në Romë, thonë burimet e Vatikanit.

Sipas BBC, stafi më i afërt i Papës, përfshirë sigurinë, pritet të qëndrojë natën në spitalin Gemelli nëse Papa nuk dërgohet në shtëpi.

Axhenda e Papa Françeskut thuhet se është anuluar për dy ditët e ardhshme. Një burim tha se kontrollet mjekësore do të vazhdojnë për aq kohë sa të jetë e nevojshme.

Nuk është e qartë nëse një sëmundje e re e nxiti vizitën e tij në spital. Zëdhënësi i Vatikanit Matteo Bruni tha se Papa u dërgua në spital për disa kontrolle të planifikuara më parë.

Megjithatë disa media italiane raportojnë se ai mund të ketë vuajtur nga probleme të frymëmarrjes dhe më pas është dërguar në spital me ambulancë.

Kjo është periudha më e ngarkuar e vitit për Papa Françeskun, 86 vjeç, me shumë ngjarje dhe shërbime të planifikuara përpara fundjavës së Pashkëve.

Papa ka vuajtur nga probleme lëvizëse të lidhura me gjurin e tij muajt e fundit, duke e detyruar atë të përdorë një karrige me rrota. Ai gjithashtu iu nënshtrua një operacioni për të trajtuar një problem të zorrës së trashë në të njëjtin spital në Romë në vitin 2021.

Në janar, Papa udhëhoqi funeralin e paraardhësit të tij, Papa Benediktit XVI  i cili ishte Papa i parë që dha dorëheqjen vullnetarisht për shekuj. Ai tha se kjo ishte për shkak të shëndetit të keq.

Papa Françesku ka treguar më parë se ai gjithashtu mund të dëshirojë të ndjekë hapat e Benediktit në rast se shëndeti i tij përkeqësohet.

LEXONI GJITHASHTU:

• Rebelët e Ushtrisë Çlirimtare Kombëtare vrasin 9 ushtarë kolumbianë
• Presidenti austriak në Maqedoninë e Veriut: Ndryshoni Kushtetutën
• Kush janë dy kandidatët e rinj që garojnë për Alibeajn