Papa ka firmosur dorëheqjen: Braktis detyrën nëse shëndeti më pengon

Ati i shenjtë, Papa Françesku zbuloi në një intervistë të publikuar të dielën në shtypin spanjoll se, pasi u zgjodh në vitin 2013 firmosi një letër dorëheqjeje, të cilën do ta përdorte në rast se problemet shëndetësore do t’i pamundësonin të kryente detyrën.

Jorge Bergoglio, që mbushi 86 vjeç ditën e shtunë dhe u shfaq në gjendje të mirë shëndetësore, i bëri komentet e tij për gazetën iberike “Abc”.

Sipas rrëfimit, më pas Papa ia dorëzoi letrën sekretarit të shtetit të Vatikanit, Tarcisio Bertone, i cili mbante detyrën që prej papatit të benediktit të 16-të dhe që e vazhdoi për rreth 6 muaj të tjerë pas zgjedhjes së Françeskut më 13 mars 2013.

Papa Françesku ka deklaruar shpesh herë se do të dorëhiqet në rast se gjendja shëndetësore e pengon që të qeverisë kishën katolike romake.

Kur u pyet gjatë intervistës nëse në selinë e shenjtë duhet të caktohet një normë për rastet kur problemet shëndetësore e pengojnë papën të kryejë detyrën e tij, ai u përgjigj:

“E kam firmosur dorëheqjen time kur Tarcisio Bertone ishte ende sekretar i shtetit. E nënshkrova dhe i thashë: në rast problemi për çështje mjekësore apo të tjera, këtu është dorëheqja ime”, është cituar të thotë Papa Françesku.

Në intervistën e së dielës, ati i shenjtë shtoi se besonte se Papa Pali i gjashtë dhe papa piu i 12-të kishin firmosur letra të tilla. Sidoqoftë, të dy ata ndërruan jetë teksa ishin ende në detyrë.

LEXONI GJITHASHTU: 

• Identikiti i vrasësit/ Me kapuç, pantallona të errëta dhe atlete me gomë të bardhë
• Vijon vala e bombardimeve, 5 viktima në 24 orët e fundit në Ukrainë
• Sulm me bombë në Irak, 7 policë të vrarë