‘Gropa energjetike nga korrupsioni jo nga tregjet’, Basha: Do nxisim çdo formë të rezistencës qytetare

Kryetari i Partisë Demokratike, Lulzim Basha tha se kriza energjetike e paralajmëruar një ditë më parë nga kryeministri është një fatkeqësi e radhës e përgatitur nga qeveria, ndërsa gropa e krijuar në sistem ka ardhur për shkak të korrupsionit, jo tregjeve ndërkombëtare.

Në një deklaratë për mediat pas mbledhjes së grupit parlamentar, kryedemokrati tha se sot Shqipëria ka çmimin më të latë të energjisë dhe çmimin më të lartë të naftës në rajon për shkak të keqqeverisjes. Ai tha se PD do të mbështesë të gjitha llojet e rezistencës qytetare.

Burime për Euronews Albania bëjnë me dije se gjatë mbledhjes së sotme në grupin parlamentar demokrat, Basha u ka kërkuar deputetëve që të kenë kontakt direkt me qytetarët ‘për të nxitur, inkurajuar, organizuar të gjitha format e rezistencës ndaj skemave të Edi Rames për boshatisjen e xhepave të qytetarëve’.

Kryeministri Edi Rama tha një ditë më parë se Shqipëria po preket nga kriza ndërkombëtare e energjisë, e cila parashikohet të diktojë rritjen e çmimeve të elektricitetit dhe karburanteve deri në gjashtëmujorin e parë të vitit të ardhshëm.

Sidoqoftë Rama u zotua se qeveria e tij do të bëjë të pamundurën për të minimizuar efektet e kësaj krize.

“Kini besim të plotë, siç kam edhe unë besim të palëkundur, se siç ia dolëm me tërmetin e me pandeminë, do t’ia dalim edhe kësaj sfide të madhe me energjinë dhe jini të sigurtë, se siç nuk na vunë përfund rrënojat e pafundme të tërmetit, e siç nuk na gjeti të papërgatitur sulmi i Armikut të Padukshëm, ashtu nuk na gjen të papërgatitur, e as as nuk na ve dot përfund as kjo krizë e jashtëzakonshme”, – tha Kryeministri.