Paraqitja surprizë e Elon Musk në tubimin e AfD, akuza për ndërhyrje në zgjedhje

Elon Musk ka bërë një paraqitje surprizë gjatë një tubimi të fushatës zgjedhore të Alternativës për Gjermaninë (AfD) në Halle, më 25 janar, ku mbështeti publikisht partinë e ekstremit të djathtë për herë të dytë në dy javë. Përmes një video-mesazhi, Musk iu drejtua një audience prej 4,500 personash, duke kërkuar ruajtjen e kulturës gjermane dhe vlerave kombëtare, një koment që u prit me brohoritje nga të pranishmit, përfshirë lideren e AfD, Alice Weidel.

“Është mirë të jesh krenar për kulturën gjermane, vlerat gjermane dhe të mos e humbësh atë në një lloj multikulturalizmi që dëmton gjithçka,” deklaroi Musk, duke theksuar se Gjermania duhet të ruajë identitetin e saj kombëtar.

AfD, një parti që ka fituar mbështetje të konsiderueshme vitet e fundit, ka parë një rritje të përkrahjes, duke u bërë partia e parë e ekstremit të djathtë që fitoi zgjedhje shtetërore që nga periudha naziste. Megjithatë, ajo ka tërhequr kritika të shumta për qëndrimin e saj të ashpër kundër emigrantëve, duke i bërë të gjitha partitë kryesore të Gjermanisë të deklarojnë se nuk do të bashkëpunojnë me të.

Në të njëjtën kohë, dhjetëra mijëra gjermanë kanë protestuar kundër partisë AfD, përfshirë një demonstratë masive në Berlin ku mijëra njerëz mbajtën pankarta dhe kënduan këngë antifashiste. Po ashtu, 40,000 protestues morën pjesë në Këln, kundër mbështetjes që Musk ka shprehur për AfD-në.

Kjo lëvizje e Musk ka shtuar tensione të mëdha në Europë, pasi ai është kritikuar për mbështetje të partive populiste dhe për përfshirjen e tij në politikën evropiane. Gjatë këtij muaji, ai ka diskutuar çështje të ndryshme politike me lideren e AfD, Alice Weidel, duke theksuar rëndësinë e zgjedhjeve të ardhshme në Gjermani.

Në Britani të Madhe, Musk është akuzuar për përhapjen e “lajmeve të rreme”. Ai ka kërkuar lirimin e aktivistit të ekstremit të djathtë, Tommy Robinson. Po ashtu, qeveria gjermane ka ngritur shqetësime për ndikimin e Musk në zgjedhjet e saj, duke thënë se miliarderi po përpiqet të ndikojë në rezultatet e votimeve.

Megjithatë, Musk ka mbrojtur vazhdimisht lëvizjet politike populiste, duke paralajmëruar se zgjedhjet e Gjermanisë mund të kenë një ndikim të madh në të ardhmen e Europës dhe të botës. “Mendoj se mund të vendosë gjithë fatin e Evropës, ndoshta fatin e botës,” theksoi Musk, duke e vlerësuar rëndësinë e këtyre zgjedhjeve.

LEXONI GJITHASHTU:

• “Unë s’jam ai”- Ish-gruaja e Musk reagon pas përshëndetjes të cilësuar si naziste
• Itali| Protesta për gjestin e Elon Musk, studentët mesazh nga vendi ku u var “Duçja”