Parkimi në Vlorë? Mision i pamundur

Gjatë viteve të fundit projektet e rrugëve në Vlorë u kanë dhënë përparësi këmbësorëve duke lënë pa zgjidhje hapësirat për parkime. 

“Jam nga Kroacia, shumë e vështirë të gjesh parkim, e pabesueshme, mbrëmjen e djeshme na është dashur 40 minuta. Kemi dy ditë që jemi këtu vijmë  nga Saranda,” – u shpreh një turist.

“Jam nga Greqia, kam dhjetë ditë këtu, vendi më pëlqen por për parkim është e vështirë, njësoj në fakt është edhe në Greqi, i njëjti problem,” – tha një tjetër.

“Shumë e vështirë të gjesh parkim do rrimë edhe 4 ditë, jemi nga Finlanda,” – u shpreh një turist tjetër.

Përballë kësaj situate shpesh parkohet edhe në hapësirat e palejuara në bazë të kodit rrugor, duke improvizuar parkime që bien ndesh edhe me tabelat orientuese.

Policia e qarkullimit rrugor pothuajse çdo ditë vendos dhjetëra gjoba që variojnë nga 5 mijë deri në 10 mijë lekë të vjetra.

Vetëm për muajt Qershor -Korrik 3295 masa administrative janë vendosur për parkime të gabuara në qytet dhe zonën bregdetare, tha për Euronews shefi i qarkullimit në Vlorë.

Sipas ekspertëve mungesa e një studimi të detajuar, ndërtimet e shumta të cilat nuk kanë parkime përkatëse janë arsyet kryesore të kësaj situate.

Zyra e infrastrukturës në bashkinë e Vlorës e pranon problemin e mungesës së vendeve të parkimit. Por këtë ia faturon projekteve që nuk parashikojnë vendparkime, siç ndodh në unazën e vogël të qytetit.

Me përfundimin e projektit Lungomare 2, pritet që të përfundojë edhe parkimi disa katësh që përfshin 420 vende parkimi.

LEXONI GJITHASHTU:

• Rreth 40 mijë gjoba për parkim të gabuar në Tiranë në 3 muajt e parë të 2022