Parlamenti grek miraton blerjen e sistemeve raketore nga Izraeli

Ligjvënësit grekë kanë miratuar blerjen e 36 sistemeve të artilerisë raketore PULS nga Izraeli për rreth 650 milionë euro, thanë dy zyrtarë me njohuri për çështjen.

“Në një seancë të mbyllur, komisioni parlamentar i mbrojtjes miratoi blerjen e sistemit PULS”, tha për Reuters një zyrtar i lartë i njohur me çështjen.

Një zyrtar tjetër konfirmoi se parlamenti dha miratimin e tij mbrëmë vonë, duke shtuar se kostoja do të ishte rreth 650 deri në 700 milionë euro.

Greqia zhvilloi bisedime me Izraelin mbi blerjen e këtyre sistemeve, dhe gjithashtu diskutoi zhvillimin e një “kupole” kundërajrore dhe kundër raketave me vlerë tre miliardë euro.

Greqia dhe Izraeli kanë lidhje të forta ekonomike dhe diplomatike, kanë kryer disa stërvitje të përbashkëta ushtarake vitet e fundit dhe operojnë një qendër trajnimi pilotësh në Greqinë jugore.

Sistemi PULS, i prodhuar nga Elbit i Izraelit, ka një rreze veprimi deri në 300 kilometra dhe, sipas zyrtarëve, do të ndihmojë në mbrojtjen e kufirit verilindor të Greqisë me Turqinë dhe ishujt grekë në Detin Egje.

Marrëveshja përfshin gjithashtu ndërtimin e disa komponentëve në Greqi.

Greqia ka thënë se do të shpenzojë rreth 28 miliardë euro për modernizimin e forcave të saj të armatosura deri në vitin 2036, ndërsa del nga kriza e borxhit të viteve 2009-2018 dhe kërkon të mbajë ritmin me rivalin e saj historik, Turqinë.

Greqia dhe Turqia, të dyja anëtare të NATO-s, kanë qenë prej kohësh në konflikt për çështje të tilla si kufijtë e shelfeve të tyre kontinentale, burimet e energjisë, fluturimet mbi Egje dhe ishulli i ndarë etnikisht i Qipros.

LEXONI GJITHASHTU:

• Greqia tronditet nga tërmeti, sa ishte magnituda
• Kontrabandoi veshje nga Greqia, arrestohet shoferi i autobusit në Kapshticë (EMRI)