PD: Ardi Veliu ka qenë çdo ditë në shërbim të grupeve kriminale

Partia Demokratike ka reaguar pas dorëheqjes së Ardi Veliut nga drejtimi i Policisë së Shtetit.

Sipas saj, duke nisur nga sot në radhët e Policisë ka një “bandit më pak”, kurse largimin e tij e cilëson të detyruar, pavarësisht rezistencës së bëra nga kryeministri Edi Rama.

Sekretari i Përgjithshëm i PD, Gazment Bardhi, shkruan në “Facebook” se ish-kryepolici ka qenë në shërbim të “grupeve kriminale dhe rrjeteve të caktuara të trafikut ndërkombëtar të drogës”.

Partia Demokratike thotë se largimi i Ardi Veliut nuk e përmirëson situatën për sa kohë kryeministrit është “partneri kryesor i krimit të organizuar”.

Sipas PD, lufta ndaj krimit të organizuar nuk mund të realizohet pa largimin nga detyra të kryeministrit Rama.

“Pa largimin e Edi Ramës, nuk ka për të pasur kurrë luftë serioze ndaj krimit, policët e ndershëm do të vazhdojnë të ndihen të tradhtuar dhe të demotivuar, si dhe ngjarjet e rënda kriminale do të vijojnë të tronditin qytetet tona”, shkruan z. Bardhi në “Facebook”.

LEXONI GJITHASHTU: 

• Zyrtare, dorëhiqet drejtori i Policisë së Shtetit