16 muaj në shtëpitë e dëmtuara nga tërmeti, PD denoncon rastin e banorëve në Ersekë

Partia Demokratike ka denoncuar këtë të shtunë rastin e banorëve të fshatit Qafzez në Ersekë, shtëpitë e të cilëve u dëmtuan nga tërmeti i qershorit dhe nëntorit të vitit të shkuar.

Sipas tyre, e vetmja ndihmë që kanë marrë nga shteti janë disa rroba që banorët i kanë përdorur për të zënë të çarat e shtëpive të dëmtuara rëndë nga tërmeti.

Ish-deputeti i PD, Ervin Salianji ishte në disa prej këtyre banesave ku bisedoi me banorët e dëmtuar, të cilët i thanë se nuk kanë marrë zgjidhje dhe nuk e dinë cili do të jetë fati i banesave të tyre.

“Ja ku janë! Rreckat që janë këtu m’i dhanë vjet në nëntor, në 2 nëntor. Nuk i vura në garderobë, por i vura për të zënë vrimat se më thanë do t’i rregulloj. Ja se ç’i bëra, i vura këtu për të mos …”,- tha Festim Çaushi, një banor i fshatit.

Ai theksoi se nuk ka marrë asnjë qindarkë nga lekët që i janë premtuar për dëmin që i është bërë shtëpisë nga tërmeti.

“Fillimisht ma cilësuan në 1 qershor, 1 milionë e 324 mijë dëm. Asnjë, asnjë qindarkë mo, dhe nuk kam parë të vijë njëri siç erdhe ti sot”,- u shpreh banori.

Ndërkaq një tjetër banor, Gazmor Kasëmi u shpreh se pavarësisht se shtëpia e tij është shpallur e pabanueshme ai vijon të jetojë aty me shpresën se shtëpia do të rindërtohet.

“Po, akoma këtu, dhe shtëpia ku fle sot jemi përpjekur me mundësitë tona, edhe në institutin Tiranë, kemi vajtur i kemi bërë kartat, kanë ardhur në Bashki dhe neve kryetari na thotë kini durim, akoma se do i bëjmë”,- u shpreh Gazmor Kasëmi.

Ndër të tjera banori theksoi se ka 16 muaj që fle në pllaka e se nuk ka marrë asnjë shumë lekësh.

Një tjetër banore, Minushe Merka, e sëmurë me astmë dhe me burrin e papunë është shprehur e shqetësuar për gjendjen e situatës.

“Absolutisht, moj s’na kanë hedhur sytë! Na shikojnë se çfarë jemi, sikur jemi, jo sikur jemi popull jetojmë të gjithë bashkë e vëllezër e motra, por sikur jemi hasëm. Edhe hasmi që është hasëm bëhet një veprim”,- u shpreh znj. Merka.