PD e quan ‘pushtim’ praninë e të përjashtuarve në grupin parlamentar

Partia Demokratike e cilëson ‘pushtim’ pjesëmarrjen e Berishës dhe personave të tjerë të përjashtuar nga grupi parlamentar.

“Vendimet, veprimet, pushtimet nuk e ndihmojnë PD dhe nuk i shërbejnë bashkimit dhe as të ardhmes së demokratëve. Alternativa jonë e së nesërmes nuk mund të jetë kurrë një alternativë dhune dhe pushtimi apo izolimi nga partnerët tanë euro-atlantikë, me të cilët ia kemi dalë të sigurojmë arritjet më madhore për shqiptarët”, thuhet në komunikatë.

Vendimi i gjykatës që njeh Statutin e miratuar në Kongresin e thirrur nga Berisha, thuhet në reagim nuk është i formës së prerë dhe do të pritet zbardhja për të bërë ankimim.

“Vendimi i Gjykatës për Kuvendin e 11 dhjetorit nuk është i formës së prerë. PD është në pritje të zbardhjes së vendimit për të bërë ankimim sipas ligjit”, thuhet në reagim.

Ndërsa pritet vendimi i Gjykatës për regjistrimin e vendimeve të Kuvendit Kombëtar të datës 18 dhjetor nga Basha, PD thekson se do të zbatojë çdo vendim gjykate të formës së prerë.

Në mbledhjen e së enjtes të grupit parlamentar të PD, ishin të pranishëm Berisha dhe deputetë të tjerë të përjashtuar nga grupi.

LEXONI GJITHASHTU:

• Berisha: Do kem zyrë në PD, partia s’ka kryetar
• Berisha të tërhiqet që demokratët të bashkohen, thotë Alibeaj