PD ka pritshmëri që rezultati i zgjedhjeve të ndryshojë, Alfred Rushaj: Do ketë surpriza

Partia Demokratike pret që me vijimin e numërimit të votave rezultati të ndryshojë.

Kandidati për deputet, Alfred Rushaj, tha në një deklaratë për shtyp se me vijimin e procesit “do të ketë surpriza”. Rushaj tha se PD do të rikuperojë.

“Sot, pamë konkretisht se si dy vende deputetësh u rikuperuan. Vazhdimi i numërimit do të ketë të tjera surpriza të pakëndshme për kundërshtarët tanë,” – u shpreh Rushaj.

Kandidati i PD-së u bëri thirrje komisionerëve, vëzhguesve dhe numëruesve, “të mos tjetërsojnë vullnetin e qytetarëve”.

“[Qytetarët] Ata kanë votuar për ndryshimin, ata presin ndryshimin dhe ne do ju sjellim ndryshimin,” – u shpreh Rushaj.

Deri në orën 21:00 kur qenë numëruar rreth 70% e qendrave të votimit, në rang vendi rezultati shihte PS-në në krye me rreth 100 mijë vota më shumë se koalicioni i PD-së.