PD: Konfirmon SPAK, Ervin Bushati nën hetim për mosdeklarim të pasurisë dhe falsifikim dokumentesh

Partia Demokratike ka njoftuar se Prokuroria e Posaçme Antikorrupsion ka konfirmuar për selinë blu se deputeti Ervin Bushati është nën hetim për dy vepra penale, në lidhje me mosdeklarimin e pasurisë.

PD sqaron se kërkoi transparencë një javë më parë përmes një letre nga Sekretari i Përgjithshëm Gazment Bardhi, nëse SPAK ka regjistruar procedimin penal deputetit të PS, Ervin Bushati. Sipas PD-së ai tashmë është paditur për fshehje të pasurisë, mosdeklarim të pasurisë dhe falsifikim të dokumenteve.

Në përgjigje të kësaj kërkese, PD njofton se SPAK u ka kthyer përgjigje, në të cilën thuhet se në datën 12.03.2020, ka regjistruar procedimin penal nr. 93/2020 për veprat penale fshehje dhe mosdeklarim të pasurisë dhe falsifikim të dokumenteve.

Procedimi penal, sipas PD, është në fazën e hetimit dhe po ndiqet prej 8 muajsh nga prokurorja e SPAK, Doloreza Musabelliu.

PD e ka depozituar kallëzimin që në tetor 2018 dhe çështja u kalua nga Prokuroria e Tiranës tek SPAK, pas krijimit të kësaj prokurorie.

“Bëhet fjalë për mosdeklarimin e 7 pasurive të paluajtshme në emër të Ervin Bushatit, përfshirë më shumë se 3100 metra2 truall në Tiranë, Qerret dhe Sarandë.

Konkretisht, sipas PD-së rezulton se ai nuk ka deklaruar pasuritë e paluajtshme si më poshtë:

Një pasuri me sipërfaqe 938 m2 truall, në Tiranë, e regjistruar më 21.04.2017.

Një pasuri me sipërfaqe 600 m2 truall, me sipërfaqe ndërtimi 327 m2, në Tiranë, e regjistruar më 21.04.2017.

Një pasuri me sipërfaqe 938 m2 truall, në Tiranë, e regjistruar më 25.07.2014.

Një pasuri me sipërfaqe 76 m2, ndërtesë, në Qerret, Kavajë, e regjistruar më 30.05.2016.

Një pasuri me sipërfaqe 376 m2 truall, në Qerret, Kavajë, e regjistruar më 30.05.2016.

Një pasuri me sipërfaqe 660 m2 truall, në Sarandë, e regjistruar më 17.07.2014.

Një garazh me sipërfaqe 42 m2, në Sarandë.”, njofton PD.