PD kundër buxhetit të Bashkisë së Tiranës: Nuk përfaqëson interesat e qytetarëve

Partia Demokratike akuzon bashkinë e Tiranës se buxhetin e vitit të ardhshëm e ka orientuar tek interesat klienteliste të kryebashkiakut Erion Veliaj dhe jo tek interesi i qytetarëve.

Në një deklaratë për mediat ish-deputetja e Partisë Demokratike, Jorida Tabaku shprehet se buxheti 2021 i Bashkisë së Tiranës nuk zgjidh asnjë nga probleme të përditshmërisë së qytetarëve, ‘por rrit numrin e punësuarve partiakë në administratën e bashkisë, që paguhen me taksat e qytetarëve të Tiranës’.

“Buxheti që Erion Veliaj pritet të miratojë këto ditë nuk merr në konsideratë asnjë ndihmë për bizneset e vogla, megjithëse shumica e bizneseve të goditura nga pandemia janë në Tiranë. 

60 biznese mbyllen në ditë. Papunësia është rritur me 100 mijë të papunë, por për të zbutur këtë krizë të thellë Erion Veliaj nuk ka marrë asnjë masë në buxhet.

Në të kundërtën e ndihmës, Kryetari i Bashkisë së Tiranës ka parashikuar të shtrydhë edhe më tej bizneset dhe qytetarët, të cilët do të paguajnë më shumë se këtë vit rreth 21 milionë euro taksë mbi ndërtesën.

Të gjithë do të paguajmë më shumë edhe për pastrimin e qytetit. Janë 17 milionë euro më shumë për taksën e pastrimit, por këto nuk do të shkojnë që të kemi një qytet më të pastër jo vetëm në qendrën e tij. Erion Veliaj do t’i çojë paratë në llogarinë e inceneratorit të Tiranës”, shprehet ish-deputetja e PD.

Tabaku akuzoi kryebashkiakun e Tiranës se ka thyer rekord me lejet e ndërtimit, betonizimin dhe taksat e larta duke e bërë kryeqytetin një vend të pabanueshëm.