“PD mbështet çdo kërkesë të pedagogëve”, Berisha reagon për protestën e pedagogëve

Kryetari i Partisë Demokratike, Sali Berisha u shpreh sot në një konferencë për mediat se mbështet protestën dhe kërkesat e pedagogëve ndaj qeverisë Rama.

Sipas Berishës, përgjigja e Ramës ndaj pedagogëve ishte përçmuese dhe me urrejtje.

“Pra u thotë studentëve, familjeve të tyre, paguani ju tani për pedagogët e studentëve. Këtë nuk e bën kush në botë, përveçse ka qenë një formë në Jugosllavinë e Titos. Nëse mbetet që pedagogët të paguhen me tarifat e studentëve, ato janë thjesht një iluzion. Bordet që përfaqësojnë qeverinë universitete, kanë zhdukur lirinë akademike dhe kanë vendosur universitetet në kontroll të plotë totalitar. Me këtë rast i bëj thirrje çdo pedagogu, punonjësi, laboranti, studenti e familjari të mos përkulen para këtij qëndrimi arrogant të një njeri mashtrues që po i çon universitetet drejt shkatërrimit. Qytetarët të mbështesin këtë protestë, si kusht për të ruajtur universitetet si shtëpitë ku formohen intelektualë shqiptarë. Duke dënuar me ashpërsi më të madhe deklaratat që Rama bëri në UBT sot, bëj thirrje të vazhdohet kjo beteje, PD do të qëndrojnë fuqishëm në mbështetje të kërkesave të drejta”, tha Berisha.

Mëngjesin e sotëm, Rama u është përgjigjur pedagogëve të cilët zhvilluan një protestë.

Gjatë fjalës së tij në Universitetin Bujqësor të Tiranës, Rama u shpreh se do të ketë një rritje prej 7% të pagës, por pjesa tjetër do të lihet në vendimmarrjen e universiteteve.

Ndërkohë, pedagogët paralajmëruan se më 17 tetor nuk do të hyjnë në auditorë për të filluar vitin e ri shkollor, nëse nuk u plotësohen kushtet.

LEXONI GJITHASHTU:

• Rama u përgjigjet pedagogëve: Të mërkurën rrisim pagën 7%
• “Nuk hyjmë në auditorë”, pedagogët kërkojnë rritje pagash
• Isufi: Pedagogët s’blejnë dot asnjë botim shkencor, më 17 tetor bojkot i plotë