PD prezanton programin për kulturën, Basha: Teatri kombëtar do të ndërtohet aty ku ishte, ashtu siç ishte

Në sheshin përpara vendit ku ndodhej dikur Teatri Kombëtar, Partia Demokratike ka prezantuar sot programin për Artin, Kulturën dhe Trashëgiminë Kombëtare.

Kryedemokrati Basha u zotua se pas 25 prillit, nëse Partia Demokratike do të vijë në pushtet, Teatri do të ndërtohet aty ku ishte, ashtu siç ishte.

“Unë dhe PD zotohemi solemnisht që të rindërtojmë teatrin Kombëtar aty ku ishte, ashtu siç ishte dhe i pajisur me të gjithë infrastrukturën e nevojshme” u shpreh z. Basha.

Në lidhje me programin e PD-së për kulturën, kreu i PD-së tha se do të përkujdesen për të gjitha fushat ku shtrihet arti dhe kultura.

“Ne angazhohemi ta bëjmë artin, kulturën dhe trashëgiminë kulturore të aksesueshme për të gjithë, jo vetëm si një e drejtë themelore e njeriut, por edhe një faktor themelor për një shoqëri më të shëndetshme, më tolerante, më gjithëpërfshirëse”, tha z. Basha.