Peleshi replikon me Bardhin: Këshilli i Mandateve nuk ka shkelur asnjë nen dhe afat

Kryetari i Kuvendit, Niko Peleshi gjatë fjalës në Kuvend replikoi me kreun e grupit parlamentar të PD-së, Gazmend Bardhi. Bardhi kërkoi shqyrtimin e menjëhershëm të kërkesës së SPAK për t’i hequr imunitetin Belinda Ballukut në mbledhjen e Këshillit të Mandateve.  

Peleshi tha se Këshilli nuk ka shkelur asnjë nen dhe afat. Ai theksoi se për pak ditë do të kryhet mbledhja se do të respektohen opinionet e palëve.

“Asnjëherë nuk e ke kontestuar interpretimin që kryetari i Kuvendi i bën rregullores, se në fakt nuk ka nevojë shumë për zgjuarsi se është e qartë. Ne e kemi një afat për rregulloren. Veprimtaria e Këshillit të mandateve nuk ka shkelur asnjë nen dhe afat, jemi brenda të afatit.

Për pak ditë, të hënën, do të zhvillojmë mbledhjen pasi është respektuar e drejta e të gjitha palëve. Këshilli nuk është organ vendimmarrës por këshillimor. Kryetari i Këshillit të Mandateve është i detyruar të respektojë opinionet të gjithë palëve. Misioni im është ta mbaj në normalitet Kuvendin”, u shpreh ai.