Pemët në Durrës kërcënim për qytetarët, era shkakton rrëzimin e tyre

Pemët po kthehen në një rrezik serioz për përdoruesit e rrugëve në Durrës.

3 të tilla kanë rënë brenda 24-orëve, për shkak të erës së fortë që përfshiu qytetin bregdetar 2 ditët e fundit.

“E ka fajin zinxhiri, hallkat e zinxhirit që nuk kapin njëra-tjetrën, se po ta kapin e ke punën e zgjidhur,” tha një burrë.

“Dje që ra ajo e priti ajo makina, po të kishte qenë ndonjë autobus me fëmijë, do kishte bërë ndonjë katastrofë më të madhe,” – u shpreh një tjetër.

Më serioz është problemi, nëse ecën përgjatë rrugës “Kasem Durrësi”.

Atje rrapat shumë-vjeçarë janë anuar dhe kanë filluar të çajnë trotuaret, duke kanosur jetën e kalimtareve.

“Gjithë rrugën që erdha kam mbajtur dorën në kokë,” – tha një grua.

“Po sa degë të larta bien nga sipër, i bien njerëzve në kokë, në qafë. Mua të parin më ka rënë një pas kurrizi,” – u shpreh një burrë.

Qytetarët ankohen se ndërhyrjet nga ana e bashkisë janë minimale.

“Bashkia duhet t’i krasisë, t’i presë degët, që të jenë më të lehta,” – tha një burrë.

“Vijnë bëjnë ndonjë gjë të vogël, por këto duhen ulur,” – u shpreh një tjetër.

“S’kemi parë të vijnë t’i mirëmbajnë, duhet të vijnë,” – u shpreh një grua.

Për të evituar përsëritjen e episodeve të ngjashme, sektori i gjelbërimit në Ndërmarrjen “Rruga” pritet të nisë krasitjen e rrapave nga fillimi i rrugës “Kasem Durrësi” deri tek kryqëzimi i dytë tek aksi “Hajdar Dushi”.

Burime konfirmojnë për Euronews Albania se ndërhyrja do të realizohet gjatë orëve të natës, për të mos bllokuar qarkullimin e mjeteve.

LEXONI GJITHASHTU:

• Bie prodhimi i gështenjave në Elbasan, shkak temperatura dhe insektet dëmtuese
• Si liberalizimi i vizave në Kosovë mund të ul rritjen ekonomike