Për lidhje me krimin s’jam akuzuar as nga kundërshtarët, pretendon Berisha

Sali Berisha u shpreh se nuk është akuzuar kurrë për lidhje me krimin e organizuar dhe kriminelë as nga kundërshtarët dhe as nga asnjë institucion zyrtar kombëtar apo ndërkombëtar.

Në një deklaratë për mediat, Berisha konfirmoi se i është ndaluar hyrja në Mbretërinë e Bashkuar, pasi kjo e fundit nisi “valën e parë të një serie veprimesh për të inkurajuar llogaridhënien dhe për t’i dhënë fund pandëshkueshmërisë”

“Ju jeni dëshmitarë të faktit se, askush tjetër sa unë nuk ka denoncuar pa ndalur, pa kompromis, me emra, pa marrë parasysh asnjë rrezik personal apo familjar, kriminelët, grupet e organizuara kriminale të këtij vendi, dhe lidhjet e tyre me qeveritarë,” – u shprteh Berisha.

Ai akuzoi qeverinë se ka ardhur në pushtet me ndihmën e bandave dhe se u ka dhënë role të rëndësishme kriminelëve gjatë udhëheqjes së vendit.

“Së dyti, në lidhje me biznesmenin Damir Fazlliç. Nuk kam pasur kurrë dijeni, as sot nuk di që ai të ketë qenë ndonjëherë objekt padish për aktivitet kriminal, në MB ku ai është qytetar, apo në ndonjë vend tjetër,” – argumentoi Berisha i cili shtoi se Fazlliç ka sjellë kapital në Shqipëri nëpërmjet bankave dhe në përputhje të plotë me legjislacionin shqiptar dhe ndërkombëtar.

Kreu i Partisë Demokratike ftoi Mbretërinë e Bashkuar të paraqesë prova për akuzat, ndërsa shtoi se do të konsultohet me ekspertë ligjor për të marrë masa e për të vendosur në vend dinjitetin e tij.

LEXONI GJITHASHTU:

• Berisha: Më kanë ndaluar hyrjen në Britaninë e Madhe