Përdhunimi në grup dënohet me 20 vite burg, thotë avokati

Avokati Kujtim Cakrani thotë se Shqipëria dhe Kosova kanë dënime penale të ndryshe, në lidhje me abuzimet seksuale.

Në emisionin “Sot” në “Euronews Albania”, Cakrani u shpreh se Kodi Penal i Shqipërisë, parashikon dënim deri në 20 vjet për përdhunime që kryheshin në bashkëpunim, ndërsa në Kosovë 5-10 vjet.

“Shqipëria ka masat më ekstreme përsa i përket dënimeve penale për këto lloj veprash penale. Dënimet penale përsa i përket Kosovës dhe Shqipërisë janë të ndryshme. Unë kam parë Kodin Penal të Kosovës, parashikon dënimin nga 5-10 vjet. Ndërkohë, që për të njëjtën vepër penale për të mitur, nën 14 vjeç, në Shqipëri parashikohet dënimi nga 5-15 vjet.

Kur është në bashkëpunim, si në rastin konkret parashikohet 20 vjet. Ky është maksimumi. Nuk mund ta dënosh me vrasje sepse nuk ta lejon as Konventa Evropiane. Masa e dënimit është shumë e madhe, zbatimi dhe monitorimi është problem i madh”, theksoi avokati.

Ditën e djeshme qytetarë të Tiranës u mblodhën në sheshin “Nënë Tereza” për të protestuar për përdhunimin e 11-vjeçares në Kosovë nga 5 persona.

Katër prej autorëve u vunë menjëherë në pranga, ndërsa mesditën e së martës është arrestuar personi i pestë i përfshirë në ngjarjen makabre.

Për këtë rast, ka dhënë dorëheqjen edhe Drejtor i Policisë së Kosovës, Samedin Mehmeti.

LEXONI GJITHASHTU

• Protagonizëm në protestën për 11-vjeçaren, si lindi përplasja për organizimin
• 11-vjeçarja u përdhunua në një park lojërash, detaje nga ngjarja tronditëse
• Përdhunimi i 11-vjeçares, banori i zonës: S’i njoh autorët, të frikësuar për fëmijët