Përdorimi i të dhënave personale, Bushati: Kemi databazën tonë, kjo është puna që bëjmë

Pas publikimit në media të të dhënave personale të disa qytetarëve, në një intervistë për Euronews Albania, kryetari i Partisë Socialiste për Tiranën, Ervin Bushati mohon që të jenë përdorur të dhënat e qytetarëve.

“Nuk e di se çfarë kanë publikuar sepse me të vërtetë nuk e kam lexuar në thellësi, kam parë titrat dhe nuk ndryshon aspak nga puna që ne bëjmë në përditshmërinë tonë për të fituar zgjedhjet e 25 prillit ”, u shpreh Ervin Bushati.

Po ashtu, Bushati shpjegon se socialistët kanë një listë të dhënash e cila është produkt i disa vite.

“Vetëm në Tiranë ne kemi 17 mijë anëtarë të PS dhe patjetër që ne kemi të dhënat tona, këto kanë qenë ndër vite të mbledhura, mbi 10-15 vite që mbledhim të dhëna dhe kemi strukturat tona organizative të cilat janë kapilar në çdo qendër votimi në Tiranë, ne kemi 930 qendra votimi ne kemi 930 organizata socialiste dhe patjetër kemi mënyrën tonë sesi punojmë ashtu si punon çdo forcë politike në botë”, tha kryetari i Partisë Socialiste për Tiranën.

Paralajmërimin e Partisë Demokratike për padi në SPAK ndaj Partisë Socialiste dhe e-Albania, Bushati i përgjigjet kështu.

“Tani ka gjetur një sport tjetër, një stil tjetër që çon çdo gjë në prokurori”, tha ai .