Përdorte padrejtësisht uniformën e Policisë së Shtetit, arrestohet 20-vjeçari

Policia e Tiranës ka vënë në pranga një 20-vjeçar, i cili dilte në rrugë i veshur me uniformë policie dhe përdorte padrejtësisht pajisje dhe shenja identifikuese të Policisë së Shtetit.

Arrestimi i të riut, me inicialet E. B., u bë nga shërbimet e Komisariatit të Policisë Nr. 5, gjatë kontrolleve të ushtruara në bulevardin “Nënë Tereza”.

Gjatë kontrollit, policia ndaloi automjetin tip “Mercedes-Benz”, që drejtohej nga i riu, i cili ishte i veshur me uniformë dhe stema policore të ngjashme me ato të përdorura nga Policia e Shtetit. Pas verifikimeve, u konstatua se E. B. nuk ishte punonjës policie.

Në vijim të veprimeve hetimore, gjatë kontrollit në banesën e tij, u sekuestruan në cilësinë e provës materiale:

• 4 dokumente identifikimi me emra dhe fotografi të dyshuara si të falsifikuara;

• 1 armë sportive të llojit pistoletë, me 2 krehra përkatës;

• uniformë policie;

• 16 stema dhe grada të ndryshme policore;

• 3 kapele me shenja të ngjashme me ato të Policisë së Shtetit.

Vijon puna për dokumentimin e plotë të rastit dhe verifikimin nëse 20-vjeçari mund të jetë i implikuar në veprimtari të tjera të kundërligjshme, që lidhen me përfitime përmes përdorimit të pajisjeve dhe uniformave policore.

Në përfundim të veprimeve të para hetimore, u bë arrestimi në flagrancë i shtetasit E. B, 20 vjeç, banues në Kamëz, dhe materialet procedurale iu referuan Prokurorisë për veprime të metejshme.