Policia e Kosovës ka konfirmuar se në mëngjesin e së enjtes janë djegur disa lokale në rrugën “Ilaz Agushi” në Prishtinë.
Policia ka thënë se në vendngjarje kanë dalë policia dhe zjarrfikësit dhe që nuk raportohet për persona të lënduar.
Malë Gashi, ushtrues detyre i komandantit të brigadës së zjarrfikësve në Prishtinë, ka thënë për mediat se zjarri ka përfshirë gjashtë biznese: Kafiteri, qebaptore, hapësira për shitje të pemëve dhe perimeve, si dhe të pajisjeve elektronike.
“Dëmet janë të mëdha, por me atë do të merren inspektorët për vlerësim. Shkaku i zjarrit ende nuk është bërë i qartë”, ka thënë ai.
Në fundjavë është raportuar edhe për djegien e një hotel-restoranti në Brezovicë, ndërsa më herët gjatë këtij muaji ishte raportuar edhe për djegien e ndërtesës së një klubi nate në kryeqytet.
Policia vijon hetimet në bashkëpunim me prokurorinë për sqarimin e plotë të rastit.
LEXONI GJITHASHTU:
- Plagosja me armë zjarri në Kukës, vetëdorëzohet autori
- Vrasja e Marigonës, Gjykata e Apelit në Kosovë lë në burg përjetë Dardan Krivaçën
