Përfundon seanca, GJKKO rrëzon kërkesën e Erion Veliaj dhe biznesmenit Abule

Ka përfunduar seanca në GJKKO për kryebashkiakun e Tiranës Erion Veliaj ku gjykata vendosi të rrëzojë kërkesën e Veliaj dhe biznesmenit Elman Abule për revokim të masës së sigurisë.

Vendimi u dha këtë të mërkurë nga gjyqtari Erion Bani.

Gjatë seancës SPAK solli informacion dy mujor, ndërsa mbrojtja e personave nën hetim kishte kërkuar revokim të masave të sigurisë, përkatësisht arrest në burg për Erion Veliajn dhe arrest shtëpie për Elman Abule.

Kujtojmë se kryebashkiaku i Tiranës Erion Veliaj u arrestua më 10 shkurt 2025.

SPAK e akuzon kryebashkiakun për kryerjen veprave penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim në 9 raste dhe “Pastrim i produkteve të veprës penale ose veprimtarisë kriminale”.

Njoftimi i GJKKO: 

1. Kërkuesi Prokuroria e Posaçme kundër Korrupsionit dhe Krimit të Organizuar
me datë 10.04.2025 ka paraqitur pranë Gjykatës kërkesën me objekt: “1. Informacion 2
(dy) mujor në lidhje me procedimin penal nr. 27, të vitit 2024; 2. Vazhdimin e zbatimit
të masës së sigurimit personal “arrest në burg”, parashikuar nga neni 238 i K.Pr.Penale,
caktuar ndaj shtetasit nën hetim Erion Veliaj dhe vazhdimin e zbatimit të masës së
sigurimit personal “arrest në shtëpi”, parashikuar nga neni 237 i K.Pr.Penale, caktuar ndaj
shtetasit nën hetim Elman Abule.”.
2. Në përfundim të gjykimit, Gjykata e Posaçme e Shkallës së Parë për Korrupsionin dhe
Krimin e Organizuar me trup gjykues të përbërë nga gjyqtari Erjon Bani, bazuar në nenet
112 dhe 246 të K.Pr.Penale, me vendimin Nr. 219, datë 23.04.2025, vendosi:
1. Vazhdimin e masës së sigurimit “Arrest në burg” parashikuar nga neni 238 i
K.Pr.Penale, caktuar ndaj personit nën hetim Erion Veliaj me vendimet Nr. 7,
datë 09.02.2025 dhe Nr. 14, datë 12.02.2025 të Gjykatës së Posaçme të Shkallës
së Parë për Korrupsionin dhe Krimin e Organizuar.
2. Vazhdimin e masës së sigurimit “Arrest në shtëpi” parashikuar nga neni 237 i
K.Pr.Penale, caktuar ndaj personit nën hetim Elman Abule me vendimin Nr. 13,
datë 13.03.2025 të Gjykatës së Posaçme të Apelit për Korrupsionin dhe Krimin e
Organizuar.
3. Ngarkohet Prokuroria e Posaçme kundër Korrupsionit dhe Krimit të Organizuar
në bashkëpunim me policinë gjyqësore për ekzekutimin e këtij vendimi.
4. Kundër këtij vendimi mund të bëhet ankim në në Gjykatën e Posaҫme të Apelit
për Korrupsionin dhe Krimin e Organizuar brenda 5 (pesë) ditëve, duke filluar ky
afat nga e nesërmja e njoftimit të këtij vendimi.

LEXONI GJITHASHTU:

• Erion Veliaj kërkon lirimin nga burgu, del përpara gjykatës të mërkurën
• Osmani: Çdo marrëveshje paqeje s’duhet të inkurajojë ambiciet imperialiste të Rusisë